ყოველი მოგზაურობისას ისეთი შეგრძნება მაქვს, თითქოს ჟანგბადით სავსე ბალიში მომაწოდეს და უჰაეროდ მყოფმა, ერთბაშად ამოვისუნთქე. მშვიდად მივაბიჯებ ქუჩაში. აქ არ მეჩქარება. მინდა, ხალხს დავაკვირდე. მათი საუბარს მოვკრა ყური, მერე რა, თუ მათი ენა ხშირად არც მესმის. ფეხისწვერებზე ვიწევი, რომ სახლებში შევიხედო და ხელი დავუქნიო სახლის ბინადრებს, მივესალმო და გავუღიმო. გზა თუ ამერია - ყველაზე აზარტული ხდება ჩემი მოგზაურობა. სულ მგონია, რომ რაღაც თამაშს ვთამაშობ და რომელიღაც, რთულ ტურში წარმატებით უნდა გავიდე. კაფეს "MARI VANNA" ბაქოს ცენტრში, ყველაზე ევროპულ ადგილზე, სასტუმრო ჰილტონის გვერდით იპოვნით. უმარტივერსად მისაგნები ლოკაცია აქვს, სულ რომ დაკარვა მოგინდეთ, ფიზიკურად ვერ დაიკარგებით და აუცილებლად მონახავთ. სუპერ სლავური და ძალიან სპეციფიური ინტერიერი აქვს. აქ ერთდროულად გხვდებათ როკოკოსა და პეტერბურგის მიქსი. ადგილი, სადაც ერთ ადგილას, ჭერში ერთდროულად 5 ჭაღი კიდია, თუმცა ამდენი ბროლი საერთოდ არ გეზედმეტება. მარჯვენა მხარეს ღია თაროებს მოკრავთ თვალს, სადაც უამრავი კონსერვისა და წნილის ქილაა ჩარიგებული. სულ პირდაპირ კი, ჭაღებს მიღმა, უზარმაზარი წიგნის კარადა ჩანს, რომელიც შიგნიდანაა განათებული. ეს ყველაფერი ისეთ მყუდრო და ჯადოსნურ გარემოს ქმნის, გარეთ გასვლა აღარც გინდება. უგემრიელესი კერძები აქვთ. გავიცანი ერთი პუტკუნა ოფიციანტი, უსაყვარლესი გოგო, რომელსაც მე და ჩემმა მეგობარმა "ფერია" დავარქვით ყველა ჩვენი სურვილის შესრულების გამო. ამ კაფეში წამით რეალობას აბსოლუტურად წყდები და რაღაც ზღაპრულ გარემოში იწყებ მოგზაურობას.
მოკლედ, მე ძალიან, ძალიან ვისიამოვნე და თუ ოდესმე ბაქოში მოხვდებით, აუცილებლად შეუარეთ პუტკუნა ფერიას, მე ამ ადგილს თამამად ვუწევ რეკომენდაციას!
Comments